Sacrosancto et exorabili loco in honore Dei et beatorum apostolorum Petri et Pauli consecrato, Cluniensi monasterio, situm in pago Matisconensi, ubi preest domnus Hemardus abbas, cum turma monachorum. Ego igitur Ieronemus, pro Dei amore et beatorum apostolorum ejus, et pro remedio animæ meæ et animarum genitoris et genitricis meæ et animæ avunculi mei Ermoardi, et pro animarum parentorum meorum et omnium fidelium christianorum, dono aliquid de rebus meæ proprietatis ad prefatum locum, in stipendiis fratrum ibi commorantium: hoc est vineam unam sitam in pago Matisconensi, in agro Meyolanensi, in villa Buferias; terminatur vero ipsa vinea a mane gutta currente, a medio die vinea Landoeni, a sero via publica, a cercio terra Sancte Crucis. Infra istas terminationes, tres partes de eadem vinea ad predictum locum cedo, eo tenore ut, quamdiu ego advixero, teneam usufructuario, et singulis annis quatuor sextarios vini de ipsa vinea rectoribus ejusdem loci tempore vindemiæ in vestitura persolvam; cum vero terminus hujus vitæ mihi evenerit, locum mihi sepulturæ inter suos familiares adtribuant, et pro requiæ animæ meæ Deum exorent. Si quis vero, quod futurum minime spero, si ego ipse, aut ullus ex heredibus meis, vel aliqua injuste immissa persona, contra hanc donationem venire temptaverit, nullatenus ad effectum valeat perducere, sed insuper, cogente judiciaria censura, tres auri libras persolvat; hæc vero donatio a me libentissime facta firma et inconvulsa permaneat, cum stipulatione subnixa. S. Ieronimi, qui hanc donationem fieri et firmare rogavit. S. Segeverti. S. Amblardi. S. Arperti. S. Teotbranni. S. Isnardi. S. Benedicti. Data per manum Rodulphi levitæ, VII idus aprilis, XV anno regnante Ludovico rege.